Генералниот секретар на НАТО Андерс Фог Расмусен упати остра осуда за вчерашниот напад, извршен од бомбаш-самоубиец врз амбасадата на САД во турската престолнина Анкара.
„Ова е еден срамен напад врз зградата на дипломатската мисија на една земја од Алијансата, извршен на територијата на друга земја од НАТО”, вели генералниот секретар Расмусен во писмена изјава.
Тој смета дека нападот покажува безобѕирност кон човечките животи и неповредливост на дипломатскиот персонал.
„Нема оправдување за таквиот чин на насилство. Тероризмот во сите видови не смее да биде никогаш толериран”, вели Расмусен.
Генералниот секретар изрази солидарност со владите на Турција и на САД, пренесува макфакс.
Во нападот на бомбаш-самоубиец на влезот во амбасадата на САД во Анкара вчера загинаа две лица, напаѓачот и припадник на обезбедувањето, додека една жена е тешко повредена.
Американскиот Стејт департмент констатира дека мерките за безбедност околу амбасадата на САД во Анкара попречиле да има многу повеќе жртви во вчерашниот терористички напад.
Портпаролот на Стејт департментот, Викторија Њуланд, рече дека благодарение на нивото на заштита на дипломатската мисија во Анкара, немало повеќе убиени и ранети.
И САД најкатегорично го осудуваат самоубиствениот напад.
Според Њуланд, американската амбасада во Турција во последните десет години презела мерки за зголемување на безбедноста, главно преку создавање на надворешен периметар за контрола на посетителите.