Седницата на собраниската Комисија за избори и именувања на која требаше да продолжи расправата за предлозите за избор на судии на Уставниот суд на предлог на ВМРО-ДПМНЕ се одложи за еден час.
Тоа се случи поради, како што образложи пратеничката Дафина Стојаноска, за да можат пратениците да присуствуваат на Анкетната комисија за заштита на правата на граѓаните која се одржува во исто време, а на која треба да се расправа за пожарот во модуларната болница во Тетово и за автобуската несреќа во Бугарија. Претседателката на Комисијата за избори и именувања Марија Георгиевска го прифати предлогот на опозициската партија. По обвинувањата на пратениците од опозицијата дека неслучајно е избран термин за расправа за уставните судии во речиси исто време со седницата на Анкетната комисија за да се дефокусира прашањето на одговорноста за двете големи несреќи, Георгиевска рече дека не може да биде одговорна и за седниците на другите собраниски тела.
Претходно, беше оневозможено да почне расправата за двете големи несреќи поради немање кворум, а Халил Снопче, претседателот на Постојаната комисија за заштита на слободите и правата на граѓаните, изјави дека власта на овој начин не дозволува да се расправа за информацијата за сообраќајната несреќа на автобусот на „Беса транс“ и за несреќата во модуларната болница во Тетово во кои загинаа 60 лица. Сепак, по реакциите на опозицијата, расправата на оваа седница доби приоритет.
Комисијата за избори и именувања се очекува да расправа за уште осум предложени судии, а прифатен е само предлогот Фатмир Скендер да биде уставен судија. Претходно се расправаше за предлогот професорката Родна Живковска да биде уставен судија, но немаше гласање.
За уставни судии се предложени и републичкиот јавен обвинител Љубомир Јовески, како и на Татјана Васиќ Бозаџиева која работи во Министерството за правда како државен советник за граѓанско законодавство, предлози од владејачките партии, но и на универзитетските професори Саво Климовски и Родна Живковска, судијата во пензија Бранко Секуловски, обвинителот Тодор Витларов, судијката од Управниот суд Весна Јовановска и јавниот обвинител Војислав Димовски од Основното јавно обвинителство во Охрид, предложени од ВМРО-ДПМНЕ.
Уставниот суд во моментот, од предвидените девет, работи без четворица судии на кои им истече мандатот.
С.М.