Кабинетот на собранискиот спикер Трајко Вељаноски соопшти дека распуштањето на пратениците во Собрането ќе биде на дневен ред на седницата која е закажана за 17.10.2016 година, после точката која се однесува на усвојувањето на Буџетот за 2017 година.
Според Вељаноски, на овој начин, македонските пратеници ќе успеат истовремено да остварат две суштински цели: прво, да ја исполнат до крај својата обврска да работат до последниот ден во интересот на државата, стабилноста на институциите и непреченото функционирање на системот со носењето на најважниот акт, Буџетот, кој секоја година го усвојуваат претставниците на народот; второ, да ја испочитуваат преземената обврска за распуштање на Собранието, бидејќи законските рокови во целост и без исклучок дозволуваат тој чин да се направи на 17 октомври за да може да се одржат изборите на договорениот датум на 11 декември.
Вељаноски очекувал од пратениците на опозицијата да застанат зад споменатиот план бидејќи, така на најдобар начин ќе ја покажеле својата посветеност кон преземените обврски од договорите.
„За Претседателот на Собранието, секој поинаков став на опозицијата, како тој за распуштање на Собранието на 12 октомври, ќе биде оценет како уште еден акт на политичка неискреност и како дел од планот на опозицијата да издејствува ново, трето по ред одложување на изборите“, се наведува во соопштението.
Неговиот кабинет наведува дека одуката е донесена во согласност со договорите што биле водени со посредство на меѓународната заедница.