Бројот на смртно настрадани лица во шумските пожари на јужниот турски брег се искачи на четири во текот на денешниот ден, трет во тешката битка на пожарникарите со огнената стихија што предизвика евакуација на десетина села и неколку хотели.
Само оваа недела се појавија над 60 шумски пожари во 17 провинции на турскиот брег на Егејското и на Средоземното Море, изјавија официјални лица со ветување дека секој кој е одговорен за пожарите ќе биде фатен.
Селата и хотелите што се евакуирани се наоѓаат во туристичките подрачја, а телевизиски снимки прикажуваат како бегаат луѓе по полиња, немоќно гледајќи како огнот се доближува до нивните домови.
Пожари и натаму се активни во туристичкиот регион Анталија и во егејското туристичко одморалиште Мугла.
Шумски пожари беснеат и на други локации низ регионот, вклучувајќи и 40-те што настанаа во Грција во последните 24 часа, засилени со ветрови и високи температури.