За мај се одложени разговорите меѓу претставници на пратеничките групи од македонското Собрание, иницирани од тројцата европратеници Иво Вајгл, Кнут Флекенштајн и Едуард Кукан, објави МИА, повикувајќи се на канцеларијата на Вајгл, од каде наведуваат дека се работи за организациски причини.
Вајгл за време на посетата на Скопје минатиот месец, најави можност разговорите, познати и како процесот „Жан Моне“, да се одржат од 15 до 17 март во Охрид и на неа освен пратеници од Собранието и тројцата европратеници се најавуваше присуство и на еврокомесарот Јоханес Хан.
Како главни теми се најавуваат Деловникот за работа на Собранието и етичкиот кодекс, иако на пратеничките групи им беше оставена можност и самите да иницираат прашања закои би се дискутирало на средбите.
Ваквите средби првично беа планирани за јануари, но Вајгл тогаш соопшти дека не добиле одговор од опозицската ВМРО ДПМНЕ за учество.
НОВА ТВ во октомври објави дека европските пратеници, посредувачи во нашата криза Иво Вајгл, Едвард Кукан и Кнут Флекенштај, заедно со комесарот Јоханес Хан, го бараат начинот за суштински исчекор во македонската ЕУ интеграција.
Нивната идеја е, помеѓу другото, одржување повеќе редовни состаноци на кои ќе бидат поканети лидерите на сите парламентарни партии и на кои нашите лидери ќе учат што значи и како се одива вистински политички дијалог и како се доаѓа до консензус во политиката. Проблем со кој Македонија се соочува долги години.
Вајгл: Проектот „Жан Моне“ не е замена за Пржинскиот договор