Независната угостителска комора со реакција до Владата во однос на одлуката за формирање на Комитет за туризам донесена на 11 мај. Прашуваат кој, со кого и на кој начин договарал формирање ваков Комитет без консултација со угостителите.
„Бараме корекции на членот 6 од Одлуката за формирање Комитет на туризам со што, покрај наведените членови и заменици, да се наведат и членови на НУК, Стопанската комора на туризам, како и членови на македонските здруженија Охридски еснаф, Тиквешки угостители, Антигонеа, Клуб еснаф, ЗУТ Крушево, и Прилепски меанџии“, се вели во дописот од НУК.
Според Комората, треба да се смени и името на Комитетот во Комитет за туризам и угостителство за со него да се опфати целокупната туристичко-угостителска индустрија.
„Бараме и очекуваме премиерот Зоран Заев на следната седница веднаш да ја исправи грешката која одредени претставници на Владата ја направиле со игнорантскиот однос“, наведува претседателот на НУК, Здравко Јосифовски.
Тој потсетува дека се уште не е одговорено на барањето на Коморите за смена на директорот на Агенцијата за промоција и поддршка на туризмот, Љупчо Јаневски, поднесено уште во октомври.
Одлуката за формирање Комитет за туризам Владата ја објави на 17 мај со напомена дека стапува во сила следниот ден, на 18 мај.