Во пресрет на вонредниот конгрес на ВМРО-ДПМНЕ закажан за 23 декември, Фронтот за демократска Македонија (ФРОДЕМ) и Иницијативата за реформи во ВМРО-ДПМНЕ се обединија во едно тело.
За претседател на тоа тело е избран Љупчо Алексовски од ФРОДЕМ.
– Со овој гест на обединување покажуваме дека ВМРО-ДПМНЕ во своите редови има сила за демократски капацитет и надминување на состојбите во партијата на демократски начин. Ја користим можноста да ги повикам останатите демократски сили кои не се задоволни од актуелното раководство и водење на партијата во погрешен правец да се приклучат и со заеднички иницијативи да ја извадат партијата од несаканата ситуација, а излезот од таа ситуација е само влегување на демократијата во самата партија, рече Алексовски на прес конференцијата.
Тие рекоа дека едно од барањата зад кои стојат е промена на статутот на партијата и демократски избор на сите тела и на претседателот. Кои се нивните ставови и како ќе настапат кога е во прашање оставката на Никола Груевски и претстојниот вонреден конгрес на ВМРО-ДПМНЕ, рекоа дека ќе ги соопштат на 17 декември.
Тврдат дека во нивните редови се наоѓаат и делегати кои имаат право на глас при изборот на партиски лидер.
-Ова е прв чин на обединување, што за македонски и за вмровски услови е голем исчекор. Самото обединување и окрупнување на демократските сили ја зголемува нашата моќ и членството за да можеме да делуваме, рече Александар Коневски од Иницијативата за реформи.
Иницијаторите ги повикаат незадоволните партиски членови да им се придружат во движењето за реформи на партијата.
-ВМРО-ДПМНЕ има сила во своите редови за демократски капацитет и надминување на состојбите кои ќе гарантираат евро-атланската иднина на државата. Ги повикувам останатите демократски сили, кои не се задоволни од атуелното раководство и водење на партијата во погрешен правец, да се приклучат и со заеднички сили да ја извадиме партијата од оваа несакана ситуација, рече Алексовски.
Прво, сакаат да видат што ќе одлучи Централниот комитет на партијата кој утре треба да заседава во однос на оставката на Груевски.