Регистерот не е замена за попис, изјави портпаролот на Владата Миле Бошњаковски, откако вчера Владата на седница донесе одлука да се изготви „Регистар на население“.
-Преку оваа алатка може да се направи електронски попис, но таа не исклучува и правење попис на население во неговата стандардизирана форма. Ова не е замена за попис, туку регистар со сосема друга намена, рече Бошњаковски.
Бошњаковски објаснува дека овој проект треба да овозможи поедноставен пристап до сите сервисни и услужни информации во повеќе институции како што се МВР, Катастар и други, односно да овозможи формирањето на Централен електронски регистар на населението,
Земји членки на ЕУ прават паралелно пописи на населението во стандардна форма и го користат регистарот да ги верификуваат тие податоци. Алатката кога ќе биде во идно време функционална целосно ја има таа можност. Дали државата ќе одлучи да го користи тоа како еден вид потврда на постигнатите резултати тоа е прашење за кое што ќе се разговара во иднина, вели Бошњаковски.
Министерот за информатичко општество и администрација Дамјан Манчевски, објаснувајќи го системот, вели дека секој граѓанин ќе добие сопствен електронски идентитет преку соодветна картичка или на некој друг начин што дополнително ќе се утврдува.
Регистарот би требало да биде ставен целосно во функција до крајот на идната година, а опремата ќе се инсталира во јуни 2018.
Централниот електронски регистар на населението поддржан е со еден милион евра од Европската унија за хардверско и софтверско решение, но не се исклучени и дополнителни трошоци кои потоа ќе следуваат за измена на законската рамка.