РЕК Битола денеска целосно излезе од електричната мрежа и не произведува струја. Според информациите од ЕСМ, првично се појавил проблем со вториот блок, а кратко потоа истиот проблем го погодил и првиот. Причините за оваа ситуација се уште се истражуваат. Се очекува дека процесот на повторно вклучување на ТЕ Битола 1 ќе започне во текот на денот, а потоа ќе следи и активирање на ТЕ Битола 3, која не беше во функција последните неколку дена според производствените планови.
Пред околу две недели, директорот Петрушевски објави дека успеале да го вклучат и третиот блок, но само по неколку дена, тој бил повторно исклучен поради неуспешен ремонт.
На прашањето дали ќе се прогласи кризна состојба на пазарот со струја, Мицкоски не понуди конкретен одговор, но изрази надеж дека ситуацијата ќе се реши со помош на РЕК Битола. Премиерот додаде дека се очекува стабилизација на производството, но истовремено предупреди дека ќе има предизвици.
Во пресрет на грејната сезона, најавено беше дека РЕК Битола ќе работи со два блока во зимскиот период, а ако се обезбедат потребни количини јаглен, третиот блок ќе се вклучи. Сепак, овие планови се со потешкотии во реализацијата.
За да ги покријат домашните потреби, ЕСМ е принуден да набавува електрична енергија од пазарот. За декември, компанијата потрошила околу 20 милиони евра за купување струја, што е приближно исто колку и загубата за месецот.