Себастијан Леб ја совлада автомобилистичката конкуренција на петтата етапа на „Рели Дакар 2017“, прва во Боливија, што се возеше од Туписе до Оруро во должина од 692 километра. Делницата со многу ризици и скриени опасности, што беше скратена поради лошото време, Французинот ја мина за 2:24,03 часа. Нани Рома задоцни 44 секунди на целта, а по него пристигна и лидерот во генералниот пласман Стефан Петерхансел.
Петтата етапа го донесе и петтиот различен победник меѓу мотоциклистите. По Вокнер, Барт, Прајс и Педредо, овојпат најбрз беше Сем Сандерленд на КТМ кој рутата со просечна надморска височина од 3.500 метри и во која доминираше пустински дел ја мина за 2:21,51 часа. Португалецот Гонзалвеш го освои второто место (+7,07 мин.), трет беше Ван Беверен од Франција (+7,29 мин.). Најдобар, пак, кај камионџиите беше Холанѓанецот Жерар де Рој (2:39,12 часа).
Следна станица по Оруро е боливискиот главен град Ла Паз каде натпреварувачите во недела ќе го имаат и единствениот слободен ден. Шестата етапа е долга 786 километри, возилата ќе минат низ песочни дини, но и крај езерото Титикака што се наоѓа на границата со Перу. Рели Дакар ќе продолжи во понеделник со седмата етапа, а финишот на годинашното издание е на 14 јануари во Буенос Аирес.