Македонија годинава е на 118-то место на ранг листата на Репортери без граници, посветена на слободата на печатот, од вкупно 180 рангирани земји, што е пад за едно место од минаната година.
– Клевета беше отстранета од Кривичниот законик во 2012 година, но обвиненијата се заменети со граѓански постапки, каде се можни големи парични и затворски казни за новинарите и за сопствениците на медиумите. Најмалку 580 тужби за клевета се поднесени од крајот на 2014 година досега, неколку десетици од нив против новинари. Како резултат на тоа, според анкетата на Македонскиот синдикат на новинари и медиумски работници повеќе од половина од новинарите во Македонија велат дека се цензурираат, наведуваат од организацијата во најновиот извештај за слободата во медиумите во 2015 година.
Најдобар резултат на листата од вкупно 180 земји што ја подготви невладината организација со седиште во Париз, има Финска, пред Холандија, Норвешка, Данска и Нов Зеланд. Најлошо рангирани се Кина, Сирија, Туркменистан, Северна Кореја и Еритреја која е последна на листата. Инаку, ова е шеста година по ред како Финска ја предводи листата на Репортери без граници.
Општа е оценката дека слободата на печатот во 2015 година се влошила во целиот свет.
– Слободата на медиумите во светот е во „голем и загрижувачки пад“ поради притисокот на властите и корпорациите, велат од Репортери без граници.