Квалитетот на услуги кои ги обезбедуваат единиците на локалната самоуправа (ЕЛС), не обезбедува ефективна и брза услуга за граѓаните, ниту пак еднаков третман, пристап и достапност за секој граѓанин и правно лице.
Ова стои во конечниот извештај на Државниот завод за ревизија а во кој се анализирале квалитетот на постојните услуги кои ги даваат ЕЛС преку своите веб-портали за периодот 2016/2020 година.
„Достапноста на е-услугите преку интернет со примена на стандардите за веб-пристапност на е‐услугите се уште не е на задоволително ниво. Движењето низ веб-порталите и обезбедувањето е-услуги, како и достапноста до информациите, упатствата и формуларите за одредена услуга не се унифицирани за сите ЕЛС, а проблематично е и пребарувањето на веб-содржините“, утврдиле ревизорите.
На прашањата да ги објават податоците за услугите што општината им ги дава на граѓаните преку своите веб-портали , не се одзвале само Арачиново, Сарај, Студеничани и Кичево.
Ревизорите утврдиле дека 38 ЕЛС (49,3 отсто) немаат наведено на своите веб- портали информации за услугите што им ги обезбедуваат на граѓаните и правните лица, две ЕЛС (2,6 отсто) имаат недостапни веб-портали, 36 ЕЛС (46,8 отсто) немаат објавени формулари за услугите кои ги обезбедуваат, 39 ЕЛС (50,6 оттсо) немаат објавено информации кои се однесуваат на административните такси за услугите, 23 ЕЛС (29,8 отсто) на своите веб-портали немаат воспоставена можност за електронско пријавување проблем при обезбедувањето на јавните услуги.
Стратегија за локален економски развој немаат изготвено 35 ЕЛС (45,4 отсто), а дури 71 ЕЛС (92,2 отсто) немаат изготвено Стратегија за развој на информацискиот систем и употреба на информатичката технологија. Стратегијата за локален економски развој на својот веб-портал, пак, не ја објавиле 54 ЕЛС (70,1).
Во најголемиот дел од општините, ревизорите констатирале недоволни човечки и материјални ресурси, потребни за воспоставување е-услуги.
