Мора да зборуваме за правадата во оваа држава и тогаш кога ја нема – за да се избориме да ја има.
Ова е пораката на директорката на Институтот за европска политика – Скопје, Малинка Ристевска-Јорданова, упатена денес за време на одржувањето на иницијалната конференција од проектот за следење на владеењето на раст во областа на правдата од Стратегијата за Југоисточна Европа 2020.
„Ова е прв проект во којшто невладините организации се вклучуваат во следењето на регионалната агенда од областа на правдата. Според стратегијата, тоа е поинаку од она што го слушаме секој ден, покрај квалитетот и ефикасноста на судството, што е елемент којшто редовно е актуелен. Има и неколку други елементи што многу ги забораваме, а во контекст на регионалната соработка се ставаат со цел раст, а тоа е прекуграничната соработка, во извршувања, стечај и еден многу важен дел што е присутен во јавноста во последно време, а тоа е алтернативно решавање на споровите, односно медијацијата“, изјави Ристевска-Јорданова.
Одговарајќи на прашањето на НОВА, да ли воопшто може да се зборува за правда во земја во која беше потребен специјален правен орган, таа одговара дека и тогаш кога ја нема, мора да се зборува за правдата како стремеж кон неа.
Проектот го спроведува Институтот за европска политика, а донатор е Регионалниот совет за соработка.
„Стратегијата за Југоисточна Европа 2020, на која Република Македонија е потписник, се фокусира на создавање работни места и европска перспектива преку зголемена регионална соработка. Стратегијата е поделена на пет столба; еден од нив е владеење за раст, а исполнувањето на оваа Стратегија претставува важен чекор во понатамошната евроатлантска интеграција на државите од регионот“, вели Дарко Малиновски објаснувајќи дека во областа правда, која ќе се следи со овој проект, стратегијата идентификува три приоритети, односно квалитет, ефикасност и компетентност на судовите и судиите.
Проектот ќе се одвива до декември годинава, а во него ќе бидат вклучени релевантни невладини организации, институции и експерти од областа на правосудството.
Малиновски дополни дека носителите на проектот тогаш ќе изготват документи за јавна политика за секој од овие приоритети.
Земјите кои се вклучени во проектот се Македонија, Србија, Албанија, Хрватска, Црна Гора и БиХ.