Заменик министерот за правда Оливер Ристовски кој учествуваше на разговорите со претставници на ВМРО ДПМНЕ во Владата околу новиот закон за ЈО, рече дека очекува до 15 септември да се донесе законот.
По денешната прва средба Ристовски кажа дека постигнале согласност со опозицијата за финансирањето на Јавното обвинитество.
– Се согласивме дека е потребно зголемување на финансиите генерално за целото Јавно обвинителство, а со тоа за негова поголема самостојност, а со тоа разговаравме за поголема одговорност на обвинителите – рече Ристовски.
За конкретно зголемување на платите на обвинителите не се разговарало, туку ќе се чека одговор од Министерството за финансии.
Ова беше прва средба на власта и опозицијата по посетата на Филип Рикер кога тој посочи дека времето за политички игри завршило.
На денешната средба, Риствовски рече дека се разговарало за законот поднесен од Владата и доколку се постигне договор со опозицијата забелешките на ВМРО ДПМНЕ ќе бидат амандмански вметнати во овој закон.
Тој кажа дека и меѓународните претставници рекле дека овој закон е добра основа за новиот закон за ЈО.
За тоа кој ќе раководи со Јавното обвинителство против организиран криминал во кое ќе се припои и СЈО, не се разговарало.
Пратеникот на ВМРО ДПМНЕ Антонио Милошоски, рече дека средбата била конструктивна и дека се договориле „околу финансирањето на обвинитеството и за поголема одговорност на обвинителите“.
Детали не сакаше да соопшти затоа што на средбата постигнале договор да не се изнесуваат повеќе информации за да се постигне конечен договор.
Клучна разлика меѓу СДСМ и ВМРО ДПМНЕ е која треба да биде иднината на истрагите кои СЈО ги отвори по јули 2017 година. Опозицијата предлага тие да бидат депонирани во Јавното обвинителство, од каде ќе се распределуваат по обвинителства, а власта смета дека сите овие истраги треба да продолжат да ги водат специјалните обвинители кои сега ќе бидат дел од Обвинителството за борба против организиран криминал.
Премиерот Зоран Заев денеска на прес-конференција изрази надеж дека ќе се најде решение, дека власта веќе прифатила повеќе предлози на опозицијата и оти го разгледува законот предложен од ВМРО-ДПМНЕ.
Заев ја отфрли можноста за условување на поддршката од опозицијата за законот со одржување предвремени парламентарни избори.
За Предлог – законот за Јавно обвинителство што го предложи Владата, претседателот на Собранието Талат Џафери закажа седница на 27 август.
Предлог-законот, за кој е потребно двотретинско мнозинство, е со европско знаменце и ќе се носи по скратена постапка.