(Легенда за графикон: Невработеноста кај младите (15-24 години) и долгорочната невработеност (подолга од 12 месеци) се драматично зголемени. Трет квартал 2008 – црна боја, трет квартал 2011 – жолта боја. Графикон ВИМЕС, извор Еуростат)
Министерот за труд и социјална политика, Спиро Ристовски и директорот на Агенцијата за вработување, Влатко Поповски, вината за високата невработеност кај младите ја гледаат и во недостигот на иницијативност и ангажман од страна на овој дел од популацијата, кој бара работа.
– Невработеноста како проблем кај младите генерално е проблем не само во Македонија, туку и во Европската унија. Не ја прифаќам констатацијата дека во Македонија тешко може да се најде работно место, туку е проблем да се ангажираат дел од луѓето да прифатат да бидат работно ангажирани. Факт е дека голем број граѓани одбиваат и пребираат работни места. Јас не велам дека секој треба да прифати да биде работно ангажиран на несоодветни работни места, но очекувам многу поголема активација, пред сѐ кај младите во борбата за добивање на што подобро и поквалитетно работно место, рече министерот за труд и социјална политика Спиро Ристовски, кој говореше на јавната дебата посветена на начините како да се намали младинската невработеност.
Директорот на Агенцијата за вработување, пак, Влатко Поповски, се согласува со ставот оти на голем дел од невработените, меѓу кои и младите им недостига амбиција и самоиницијативност.
– Многу млади луѓе се многу крути во своето барање. Бараат место во својот образовен профил, иако за тоа немаат соодветно работно искуство кое би го покажале кај работодавачите – рече Поповски.
Стапката на невработеност кај младите од 15 до 24 години на крајот од 2012 година изнесуваше 53 отсто, според податоците на Државниот завод за статистика (Adobе Acrobat датотека за преземање – страница 5) и таа е убедливо најголема во Европа.
На горниот графикон објавен од страна на Виенскиот институт за меѓународни економски студии (ВИМЕС), за периодот од третиот квартал во 2011 година, се гледа дека ниедна европска држава нема олкава голема невработеност кај младите.
Најблиску до Македонија се Словачка со 33 отсто и Летонија со 32 отсто. Но, овие стапки се смета дека се производ на светската рецесија и европската должничка криза. Пред ова, тие стапки биле далеку помали и во третиот квартал од 2008 година предничела Унгарија со 21 отсто невработеност кај младите.
Со одминувањето на кризата може да се очекува невработеноста кај младите во Европа донекаде и да се стабилизира. Но, Македонија, за жал, со својата висока невработеност кај сите сегменти од општеството, е сосема поинаква приказна.