Министерот за труд и социјална политика, Спиро Ристовски изјави дека верува дека уставните судии во финалната фаза од одлучувањето по иницијативите за постапка за три члена од Законот, ќе постапат правилно и нема да укинат одредби од законот кој е на сила од 2012 година.
Република Македонија е одговорна земја и пред се е ставен интересот на децата за што ќе продолжи со имплементација на Законот за посебен регистар на педофили и ќе направиме се за да ги заштитиме децата, изјави денеска министерот за труд и социјална политика, Спиро Ристовски.
Тој повторно истакна дека е шокиран од фактот што била прифатена иницијатива на пет педофили, кои се сторители и потенцијални повторители на ова кривично дело во услови кога ќе го завршат извршувањето на казната, нешто, што рече, го покажува и теоријата и праксата и меѓународните искуства.
– Во оваа прилика би апелирал барем малку да се одвои време и секој граѓанин да истражи преку интернет. Еве јас ќе помогнам и ќе ги насочам да го проверат случајот на девојчето Меган Канка во САД кое во 1994 година е злоупотребено по сите основи и е убиено. Овој случај е основ за соодветната држава во САД да го донесе првиот закон за посебен регистар на педофили. Потоа тој случај го користат голем број на држави во САД. Така јавноста во Америка, каде има прилично голема злоупотреба на децата и јавно се говори за неа, го направи револуционерниот чекор во насока на заштита на децата, рече Ристовски.
Тој додаде дека се уште го нема добиено образложението од Уставниот суд во врска со нивната одлука за прифаќање на иницијативата на пет педофили кои издржуваат затворска казна, за оценување на уставност на неколку одредби од Законот за регистар на педофили.
Уставниот суд минатата недела поведе постапка за три члена од Законот за посебен регистар на лица осудени со правосилна пресуда за кривични дела за сексуална злоупотреба на малолетни лица и педофилија, донесен во 2012 година.
Поведувањето на постапката е затоа што Судот смета дека членот 5, во ставовите 2 и 3 не е доволно прецизен бидејќи се навлегува во личниот и семејниот живот на осуденикот и членовите на неговото семејство, како и во личниот и семејниот живот на жртвата.
Mинистерот Ристовски побара од Уставниот суд според законот донесен во 2012 година да се објават имињата и фотографиите на осудените педофили на веб-сајт кој секој може да го посети.
Спротивно од ова, таквите одредби од законот, според Судот, немаат уставна основа по член 18 и 25, со оглед дека со член 18 од Уставот се гарантира тајноста на личните податоци, а со член 25 се гарантира личниот и семејниот живот.