На 1 јануари 2019 година Романија седнува во претседателската фотелја на Европската унија (ЕУ). Според распоредот на ЕУ, оваа земја треба да го преземе претседателството на ЕУ за нешто повеќе од еден месец. Но, политичката криза што ја тресе оваа земја ја натера Финска, како што тврди Политико.еу, да се пријави како земја што може да ја замени Романија на чело на ЕУ од 1 јануари до 30 јуни 2019 година. Финска, според ЕУ агендата, треба да следи по Романија.
Овој потег на Финска не беше виден со симпатии во Букурешт па во Брисел почнаа напорите, и оставките, на романските дипломатски и политички претставници да го подобрат имиџот на земјата во ЕУ.
Романија не е често во вестите што доаѓаат од Брисел, но ЕУ е сериозно загрижена за владеењето на правото во оваа балканска земја. Европскиот пратеници неодамна изгласаа резолуција со остра критика на судската реформа во Романија.
Реформата ја започна социјал-демократската влада која дојде на власт во 2016 година. За ЕУ, донесените закони ја нарушуваат независноста на судството, не дозволуваат да се води ефикасна борба против корупцијата а станува проблематична слободата на медиумите.
Од својот влез во ЕУ во 2007 година, Романија, заедно со Бугарија, е предмет на тесно набљудување на судските и правни реформи од страна на Европската комисија. Секоја година Брисел изработува извештај во кој се дава оценка на овие реформи. До неодамна, Букурешт беше “добриот ученик” во овој клас. Популарната обвинителка Лаура Ковеши повеќе не е на чело на Специјалното јавно обвинителство (ДНА), тело кое успешно се бореше против распространетата корупција во Романија. Министерот за правда Тудорел Тоадер упорно сакаше да ја тргне Ковеши од оваа функција и по повеќе месеци, овој потфат му успеа во јули годинава.
Така, новиот извештај на ЕК, исто како и резолуцијата на европските пратеници, се строги кон Романија и нејзината, според Брисел, очигледна желба да не оди по вистинскиот реформски пат. Според многумина, желба на новата власт е да се ослободат од затвор и обвинување редица високи функционери и бизнисмени од редовите на социјал-демократите или блиски до нив. Лица кои беа под лупата на Ковеши.
Франс Тимерманс, потпретседателот на ЕК, изјави дека жали што Романија не само што не напредува во реформите, туку се враќа назад во однос на повеќе прашања во кои имаше напредок.
«Романија мора брзо да се врати на вистинскиот пат во борбата против корупцијата и да гарантира независност на судството», рече тој пред неколку дена додавајќи негативниот извештај на ЕК е направен во желба да и се помогне на Романија а не за да ја казни.
Извештајот на ЕК инсистира исто така и врз слободата на слободни и плурални медиуми.
«Романија трчаше маратон (во реформите) и трагично би било маратонецот да тргне во спротивна насока во последните метри пред целта», рече Тимерманс.
Ова се разбира е загрижувачка слика на Романија на само еден месец од преземањето на раководната палка на ЕУ.
Во желба да ги смири стравувањата на Брисел, пред една недела Букурешт назначи нов министер за европски прашања. Портфељот му беше доделен на Георге Циамба, 52годишен дипломат од кариера. Тој дојде на местото на младиот 33годишен Виктор Негреску кој даде отказ. Според романските медиуми, Негреску морал да даде оставка бидејќи владата му замерила дека не направил доволно за да ги смири острите критики на Брисел на испраќани на романска адреса.
Оваа смена додаде нови стравувања во Брисел околу подготвеноста на Букурешт да ја води ЕУ во првите шест месеци од 2019 година. Тоа дури јасно го кажа и претседателот на држава Клаус Јоханис кој не е во конфликтни односи со владата:
«Ние не сме подготвени. Работите тргнаа во погрешна насока», изјави тој.