На седница во парламентот во Романија, денеска ќе се дискутира и гласа предлогот за изгласување недоверба на владата на премиерот Виктор Понта, поднесен од опозициската Националолиберална партија.
Гласањето за недоверба, насловено како „Виктор Понта – отстранет поради злоупотреба на власта преку блокирање на изборите. Правото на глас не е слоган“, е потпишано од 183 пратеници. За да биде успешно, гласањето на недоверба тоа треба да добие поддршка од половина плус еден од вкупниот број народни претставници.
Националната дирекција за борба против корупцијата на Романија кон почетокот на овој месец побара отворање на кривична постапка против премиерот Понта кој е осомничен за корупција, даночно затајување, перење пари и фалсификат.
Истовремено, претседателот на Романија, Клаус Јоханис најави дека побарал оставка од него.
Виктор Понта пак рече дека се работи за политички монтиран случај против него и најави дека ќе поднесе жалба.