„Сметак дека сум невин по обвиненијата кои ми се поднесени. Убеден сум дека на крајот ќе се утврди вистината“, со овие зборови денеска романскиот премиер Виктор Понта се изјасни по обвиненијата за корупција, даночно затајавање и перење пари. Изјавата на Понта пренесна од романските медиуми доаѓа по итната седница на лидерите на владејачката коалиција која се одржа денеска.
„Сакам да прецизирам дека како човек кој завршил Правен факултет, сум работел во правосудството, јас верувам во правосудството. Се сметам за невин по обвиненијата кои ми се поднесени. Јас сум минал низ многу тешки моменти и ќе минам и преку овој“, рече Понта.
Националната дирекција за борба против корупцијата на Романија во петокот побара отворање на кривична постапка против премиерот Виктор Понта кој е осомничен за корупција, даночно затајување, перење пари и фалсификат.
Истовремено, претседателот на државата Клаус Јоханис најави дека побарал оставка на премиерот. Сомневањата за корупција на премиерот ја ставаат земјата во невозможна ситуација, изјави Јоханис по неговиот разговор со премиерот.
„Најлошото што може да се случи е политичка криза во земјата“, додаде тој.
Во петокот премиерот беше повикан во дирекција за борба против корупцијата за да биде сослушан околу еден случај на корупција на еден од неговите политички сојузници. Понта рече дека сите обвинувања и сомнежи се неоправдани.
Истрагата се сомнева во конфликт на интереси во рамките на неговата премиерска функција што тој ја врши од 2012 година. Исто така истрага се интересира и за периодот пред да стане премиер и кога бил адвокат и неговите врски со Дан Сова, поранешен министер за транспорт кој исто така е предмет на истрага за корупција и злоупотреба на власта во три случаи.
Дирекцијата за борба против корупција во повеќе наврати побарала да се одземе имунитетот на Сова но парлементот тоа редовно го одбивал.
Од средината на јануари државната служба за борба против корупцијата (ДНА) влезе во битка со сите кои ја осиромашуваат и крадат земјата.
Истрагата на Дирекцијата почива на снимките на тајната служба на високи политичари.
Романија е предмет на тесна обсервација од страна на ЕУ во борбата против корупцијата и независноста на судството исто како и Бугарија. Европската комисија издава редовни извештаи за борбата против корупцијата на овие две земји откако двете станаа членки на ЕУ.
Во последниот извештај од крајот на јануари ЕК вели дека Романија конечно е на добар пат. Се досега Романија беше остро критикувана за своето судство зависно од политиката кое овозможуваше раст на корупцијата.