Русија ја обвини Велика Британија дека „си игра со оган“ и „шири лажни вести“ за случајот со отруениот двоен агент Скрипал и неговата ќерка.
Амбасадорот на Русија во ОН Василиј Небензја на состанокот на Советот за безбедност на ОН рече:„Им порачавме на нашите британски колеги дека си играат оган и дека ке жалат за тоа“.
Москва бараше да се одржи вонреден состанок на Советот за безбедност во Њујорк да се дискутира за случајот Скрипал, велејќи дека Британија треба да одговори на „легитимни прашања“. Небензја кажа дека обвинувањата биле „ужасни и неосновани“ и дека Британија ја предводи пропагандната војна против Русија.
Тој рече дека Новичок – нервниот агенс што бил користен при нападот на Скрипал – „не е заштитен со авторски права од Русија, и покрај очигледното руско име“ и се произведува и во многу други земји.
„Ова е еден вид на театар на апсурдот. Не можевте да измислите подобра лажна приказна?“праша тој.
Одговарајќи на ова, британскaта амбасадор во ОН, Карен Пирс, рече дека руското барање за средба со Јулија Скрипал и е доставено и се чека нејзиниот одговор. „Не прифаќам лекции за морал од земја која на вчерашната расправа во Советот, вложи многу напор да ја блокира истрагата за употреба на хемиско оружје во Сирија“ кажа Пирс.
Владата на Велика Британија постојано тврдеше дека Русија стои зад нападот, тврдејќи дека нема “никакво друго веродостојно објаснување”. Денеска, британскиот весник Тајмс, повикувајки се на извори од британското разузнавање пишува дека нервниот агенс бил произведен во руска воена база.
Во меѓувреме, британската полиција издаде соопштение во име на Јулија Скрипал, во кое таа напишала дека нејзината сила “расте секојдневно”. Соопштението беше објавено веднаш откако руската телевизија објави снимка од телефонски разговор помеѓу Јулија Скрипал и нејзината братучетка.