Русија планира итна реакција како одговор на одлуката на САД да избрка 35 руски дипломати поради хакерските напади врз Демократскиот национален комитет за кој САД верува дека се дело на руските служби.
Портпаролот на руското Министерство за надворешни работи Марија Закарова, на социјалните мрежи напиша дека Русија ќе ги објави своите мерки во текот на денот. Таа ја нарече администрацијата на Обама „дипломатски лузери“.
Претседателот на САД, Барак Обама вчера соопшти дека неговата администрацијата избрка 35 руски разузнавачки оперативци од САД и воведе санкции на двете водечки руски разузнавачки служби, меѓу кои и четворица високи офицери на единицата за военото разузнавање, за која Белата куќа верува дека ги наредила сајбер-нападите врз Демократскиот национален комитет (ДНК) и други политички организации.
Вообичаено за меѓународните односи, во ваквите случаи се возвраќа реципроцитетно. На пример, кога администрацијата на Џорџ протера 51 руски дипломат под сомнение за шпионажа, Москва следниот ден го направи истото со 50 американски дипломати. Но, сега се очекува дека ова нема да се случи веднаш бидејќи за три недели во Белата куќа влегува администрација на Доналд Трамп која што Русија ја смета за поповолна за нив.
Тие, сепак, во четвртокот навечер наредиле да се затвори Англо-американското училиште во Москва, барем според пишувавата на СНН кои користат брифинг од висок дипломатски извор. Во училиштето одеа деца на американски, британски и канадски дипломати и овој потег на Русија ќе го отежни животот за семејствата на дипломатите од овие земји. Се верува дека овој потег е во релација со одлуката на САД да затвори два рекреативни објекта на руската влада во САД, едниот во Мериленд, а другиот во Њујорк.
Обама порача дека САД ќе објави и докази за поврзаноста на сајбернападите со компјутерските системи на руското разузнавање. Заедно, овие акции ќе значат досега најцврст американски одговор.
Од друга страна, Доналд Трамп постојано за време на својата кампања тврдеше дека руската влада никако не е поврзана со нападите.
По заминувањето на Обама, Трамп ќе има можност да ги повлече санкциите, но се чини дека и Републиканците во Конгресот бараат јавна истрага за акциите на Русија.
Администрацијата на Обама планира во следниве 3 недели да објави и детален заеднички извештај на ФБИ и Министерството за внатрешни работи, кој делумно се заснова врз информациите од Националната агенција за безбедност.




