Заменик-премиерот на Русија Дмитриј Рогозин предлага создавање заеднички систем за одбрана од заканите од вселената, пренесува РИА новости.
„Човештвото мора да направи систем за откривање и уништување на објектите што претставуваат опасност за Земјата“, напишал Рогозин на својот официјален профил на Твитер.
Рогозин додал дека в понеделник на премиерот Дмитриј Медведев ќе му претстави предлози за начините на кои во иднина треба да се соочуваме со сличните инциденти.
И руските експерти сметаат дека треба да се изгради заеднички систем за надгледување на вселената и предупредување во случај на закана.
Заменик-шефот на руската вселенска агенција Роскосмос, Виталиј Давидов, изјавил дека треба да се подготви специјална федерална програма за неутрализирање на заканите од вселената.
Според него, тоа треба да биде приоритет број еден за Русија.
Руската ракетна и вселенска корпорација Енергиа минатиот октомври ветила дека ќе направи вселенска ракета што ќе може да ги уништи астероидите што ѝ се закануваат на Земјата.
Околу 1.200 луѓе беа повредени кога метеор експлодира над Урал, а причинетата материјална штета се проценува на околу 30 милиони долари.