Московскиот патријарх Кирил, долгогодишен сојузник на рускиот претседател Владимир Путин, вели дека конфликтот во Донбас е поради „фундаментално отфрлање на таканаречените вредности што денес ги нудат оние кои тврдат дека имаат светска моќ“.
„Тестот“ на која страна сте, рече Кирил, е дали вашата земја е подготвена да одржува геј паради на гордоста.
„За да се влезе во клубот на тие земји, неопходно е да се одржи геј парада. Не да дадете политичка изјава, „ние сме со вас“, не да се потпишуваат договори, туку да се одржи геј парада. И знаеме дека луѓето кои што се спротивставуваат на овие барања се изложени на притисок и сила“, рече Кирил за време на проповедта во Москва.
Кирил ја категоризирал војната како борба од „метафизичко значење“, за човештвото да ги следи Божјите закони.
„Ова што се случува денес во сферата на меѓународните односи нема само политичко значење. Зборуваме за нешто поинакво и многу поважно од политиката. Зборуваме за човечко спасение“, рече тој.
„Ако видиме прекршување на божјиот закон, никогаш нема да ги трпиме оние кои го уништуваат овој закон, замаглувајќи ја границата помеѓу светоста и гревот, а уште повеќе оние кои го промовираат гревот како пример или како еден од моделите на човечкото однесување“, рече Кирил.
„Околу оваа тема денес има вистинска војна“, рече тој.
Патријархот Кирил е голема религиозна личност во Русија, каде што руската православна религија се смета за составен дел на рускиот идентитет. Тој беше под притисок од својата црква од почетокот на војната да ја осуди агресијата на Путин, но неговите досегашни јавни изјави не успеаја да го направат тоа. Напротив, јазикот на Кирил ѝ даде поддршка на визијата на Путин за духовна и безвременска руска империја.