Познатиот руски писател Михаил Шишкин одби да ја претставува својата земја на саемот на книги во САД, „BookExpo America 2013“. Според „Guardian“, тој прво ја прифатил поканата, но потоа се премислил.
.Во писмото до организаторот на рускиот дел од Саемот „Роспечат“ тој напишал дека не сака да ја претставува земјата, каде што „моќта е во рацете на корумпиран, криминален режим, каде што државата е пирамида од крадци, каде изборите се фарса, каде судовите и’ служат на власта, а не на законот, каде што има политички затвореници, каде државната телевизија е проститука, каде
измамници туркаат луди закони кои не’ враќаат во средниот век – таа земја не може да е мојата Русија“, пишува Шишкин.
Синоќа тој го дообојаснил својот чин, изјавувајќи дека руското Министерство за медиуми и комуникации сакало да го купи нудејќи му учество на Саемот во Њујорк, што за него како писател би било од големо значење, но тој одбил бидејќи не сакал, на ниту еден начин да го поддржи тој режим.
Меѓународниот ПЕН центар експресно ја поддржа постапката на Шишкин.
„Јасен, внимателен и принципиелен е ставот на Михаил Шишкин, бидејќи ги изразува предизвиците со кои се соочени писателите во Русија денес. Меѓународниот ПЕН се солидаризира со неговата желба да видиме една друга Русија, која ја почитува слободата на изразување “, изјави извршниот директор Лаура Мекви.
Михаил Шишкин е еден од најзначајните современи руски писатели, тој ги има добиено трите главни книжевни награди во земјата меѓу кои и руската Букерова награда.