Руските власти побараа од Врховен суд да го прогласи украинскиот баталјон Азов за терористичка организација. Според руската новинска агенција Интерфакс, Министерството за правда во Москва соопштило дека судскиот случај „за прогласување на украинската паравоена националистичка група „Азов“ (други употребени имиња: баталјон „Азов“, полк „Азов“) како терористичка организација и забраната за нејзините активности на територијата на Руската Федерација е закажан за судење на 26 мај“.

Ова се случува во момент кога украински борци, од кои многумина се припадници на Азовскиот полк, се евакуирани од челичарницата Азовстал.

Портпаролот на Кремљ, Дмитриј Песков одби да коментира дали бранителите на челичарницата, кои сега се наоѓаат во руски притвор, ќе бидат третирани како воени затвореници или како воени злосторници.

Баталјонот Азов е формиран во 2014 година, веднаш по руската анексија на јужниот украински полуостров Крим, за да се бори против руските сили и проруските бунтовници во источниот регион Донбас.

Некои борци од Азов првично имале врски со националистички и екстремно десничарски групи. Полкот подоцна беше вклучен во Националната гарда на Украина.