Не само што нема да застари, туку истрагата за случајот „Империја“ ќе добива на интензитет, уверува обвинителката Вилма Русковска.
„Можам да кажам дека истрагата за „Империја“ ќе се интензивира. Од крајот на февруари, знаете, почна кризата со Ковид-19 и не можеше да се испитуваат сведоци. Се договоривме и со колешката Гордана Смаќоска и со колешката Лиле Стафанова во наредниот период да се интензивира работењето во овој предмет“, порача Русковска.
Случајот „Империја“ е отворен за истрага за финансиски криминал против бизнисите на Јордан Камчев и членови на неговото семејство, а во предметот, меѓу другите, се опфатени и Сашо Мијалков и Цветан Панделевски. Истрагата ја отвори Специјалното јавно обвинителство (СЈО) и ја водеше обвинителката Лиле Стефанова.
По ланскиот трансфер на предметите на СЈО кај редовните обвинителства, „Империја“ со повеќето други истраги завршија во Основното јавно обвинителство за гонење организиран криминал и корупција чија шефица е Русковска. Стефанова доби овластување да продолжи да ја води истрагата додека, покрај неа, во случајот се вклучи и обвинителката Гордана Смаќоска.
Со новиот Закон за јавно обвинителство кој стапи на сила вчера, предвидено е Обвинителството со кое раководи таа да се прошири со нови обвинители, а на прашањето дали очекува обвинителите од СЈО да го засилат тимот, таа вели дека може да конкурира секој што ги исполнува условите.
„Има интерен оглас, треба да се исполнуваат одредени критериуми и секој што ги има може да конкурира. Конечниот избор е на Советот на јавни обвинители“, нагласи Русковска.