Имаме доста материјални докази кои главно произлегоа од вештачењето на телефонот на сега обвинетиот Бојан Јовановски. Што се однесува до парите кои се подигнати од Лилјана Тодоровска и земени веднаш од обвинетата Кристина Блажевска, имаме точно локациски од вештачењето на телефонот дека завршуваат во куќата на неговите родители, имаме и слика имаме и локација, изјави обвинителката Вилма Рускоска денеска пред Основниот кривичен суд во Скопје.
Додаде дека имаат материјални докази што одат во поткрепа на обвинението, но и сведочења особено на Агапи Дика и на Лилјана Тодоровска за тоа како се одиграло потпишувањето на договорите, преговарањето во „Меѓународен сојуз“ и исказите на оштетените Силјан Мицески и Ардијан Амзоски.
Рускоска рече дека на кратко во воведните зборови кажала дека тие се обврзале дека ќе обезбедат државно неизградено земјиште, а донекаде и субвенционирање од страна на државата.
„Подетално за ова ќе видите од самите материјални докази, како и од сведочењата. Што се однесува до перењето пари исто така, не за Бојан, туку за осомничени Јасна Мандиќ и Миле Јовановски образложив зошто сметаме дека кај нив постои перење пари, односно дека парите што ги добил Бојан Јовановски по пат на измама им ги давал на нив да ги уплаќаат како позајмици или враќање на позајмици или донации на „БМЈ медиа груп“ во чии рамки беше и 1 ТВ“, рече Рускоска.
На новинарско прашање, Рускоска рече дека Бојан Јовановски се служи со лични квалификации.
„Тој е обвинет. Мене прво ме направи корумпиран обвинител, па со ништо не успеа тоа да го докаже и секакви квалификации користи што не му доликуваат. Така да, јас кажав дека може да смисли еден девијантен пример, јас не реков кој. Јас никого до сега ниту во „Рекет“, ниту во овој предмет имам намера лично да навредувам, затоа што тоа не е во правец на докажување на фактичка состојба. Бојан и во претходниот случај, а и сега се служи со лични квалификации“, рече Русковска.
На прашање за истрагата за случајот „Империја“, Рускоска рече дека предметот е даден на вештачење.
„Ќе се изврши материјално финансиско вештачење на предмето. Паралелно ќе се сослуштаат уште неколку сведоци за кои колешките сметаат дека се неопходни“, истакна обвинителката.
Во врска со случаите од поранешното на СЈО, Рускоска рече дека сите предмети кои се пред крај со истражна постапка или пред крај со предистражна постапка прво ќе одат на реферирање во ЈО на СРМ па потоа да се донесе одлука дали ќе се отвори истрага, дали треба да се надополни истрагата или да се поднесат обвиненија.
„Така да се уште ниеден од тие предмети не е рефериран“, додаде таа.
Поради влошување на здравствената состојба на таткото на Бојан Јовановски, Миле Јовановски, денешното судењето за „Меѓународен сојуз“ привремено беше прекинато на 30 минути и беше повикана брза помош.
Во случајот „Меѓународен сојуз“ се обвинети Јасна Мандиќ, Бојан Јовановски-Боки 13, Фросина Ременски, Миле Јовановски и Христина Блажеска за кривичните дела „измама“ и „перење пари“.
Во воведните зборови обвинителката Вилма Рускоска рече дека ќе докаже оти обвинетите свесно ги сториле делата и дека од почетокот оваа организација е темелена на лаги, за да им се извлечат пари на бизнисмените Силјан Мицески и Ардијан Амзоски. Обвинетите се изјаснија дека не чуствуваат вина за делата кои обвинети. Судскиот процес го води судијката Софче Гаврилова-Ефремова.