Украинскиот опозициски политичар и поранешен грузиски претседател, Михаил Саакашвили започна штрајк со глад, изјави денеска неговиот адвокат Руслан Чорнолутски.
Тој објави писмо од Саакашвили, преку кое тој ги повикува своите приврзаници на 10 декември да излезат на масовни протести во Киев и да побараат отповикување за претседателот Петро Порошенко.
Вчера, портпаролот на Канцеларијата на јавниот обвинител изјави дека обвинителите ќе побараат од судот да го смести Сакашвили во домашен притвор со мерка за електронско следење во очекување на судскиот процес.
Полицијата во Киев доцна синоќа го уапси поранешниот грузиски претседател и актуелен лидер на украинското опозициско Движење на новите сили, Михаил Саакашвили, соопшти јавниот обвинител на Украина, Јуриј Луценко.
Обвинителството го товари Саакашвили за обид за уривање на уставниот поредок, откако тој за време на минатиот викенд организираше протести против украинскиот претседател Петро Порошенко.