Американскиот државен секретар Ентони Блинкен денеска на седница на Комитетот за надворешни работи на американскиот Сенат изјавил дека општата ситуација со руската агресија врз Украина ја нагласува важноста од итна интеграција на сите земји од Западен Балкан во Европската унија и дека тоа е нешто што САД ќе го поддржува на различни начини во иднина, јавуваат светските медиуми.
На седницата Блинкен ја коментираше посетата на американските сенатори на Западен Балкан и особено се осврна на продолжувањето на мандатот на ЕУФОР во БиХ. Тој се осврна на тврдењата на сенаторот Џин Шејхин дека постои шанса Руската Федерација да го блокира продолжувањето на мандатот на ЕУФОР во Босна и Херцеговина и нагласи дека на државата и се потребни меѓународни сили за да обезбеди мир и стабилност.
„Во случај Советот за безбедност да не може да го обнови мандатот што истекува во ноември поради блокадата на Русија, мора да имаме резервна опција“, рече Блинкен.
Што се однесува до воените сили, како што рече, се согласува дека е неопходна некаква меѓународна сила со соодветен мандат за одржување на безбедна средина во БиХ.
Дека САД се со изразен фокус на Западен Балкан говори и посетата на помошникот државен секретар за Европа и Азија Карен Донфрид, која утре ќе престојува во Скопје, откако вчера беше на Косово и во Србија од каде ја испрати пораката дека САД силно ја поддржуваат европската интеграција на регионот.