Американскиот Конгрес повторно ќе расправа за предлог законот со кој ќе се олесни процедурата за воспоставување на безвизен режим за патување со странски држави.
Предлог-законот досега повеќе пати бил поднесуван од страна на неколку конгресмени и сенатори кои се посветени на неговото усвојување и добива силна поддршка во Конгресот.
Сенаторите Барбара Микулски од Мериленд и Марк Кирк од Илиноис и конгресмените Мајк Квигли и Арон Шок одново го поднесоа предлогот на почетокот на февруари.
Програмата за визно олеснување, која главно се однесува на европските држави и на сојузниците на САД, им овозможува на странските државјани да патуваат во САД до 90 дена, туристички или за деловни цели, без да мораат претходно да аплицираат за американска виза.
– Модернизирањето на програмата за визно олеснување ќе ја засили нашата национална безбедност, ќе обезбеди туристички приходи и ќе ги засили нашите односи со важни сојузници, соопшти конгресменот Квигли при поднесувањето на предлог законот.
Македонија во моментот не е земја кандидат за визното олеснување. Еден од најважните услови е процентот на одбиени барања за виза да не биде повисок од 3 проценти.
Во случајот на Македонија, процентот на одбиени барања за визи е околу 20 проценти.
Програмата денес го опфаќа најголемиот дел од европските држави – членки во Европската Унија или во НАТО, кои се оценети како економски развиени и безбедни. Грција е последната земја која издејствува безвизно патување во САД во 2010 година.
Од Европа, како кандидати, на визното олеснување се уште чекаат Полска, Романија, Бугарија, Хрватска, Кипар и Турција. Австралија, Јапонија, Јужна Кореја и Тајван исто така се вклучени во програмата, додека Израел, Бразил, Аргентина, Чиле, Парагвај и Уругвај се меѓу земјите-кандидати, а за Канада функционира специјален безвизен режим.
Изборот на државите ги прави Секретаријатот за одбрана на татковината, во консултација со Стејт департментот.
САД бараат и дополнителни гаранции од земјата за соработка во борбата против тероризмот, модерни пасоши и го задржуваат правото да исклучат земја од програмата за визно олеснување, што и им се случи на Аргентина и на Уругвај во 2002 и 2003 година.