На 70 штандови од домашни издавачи и од книгоиздателства од соседството од утре до 15 април во Метрополис арената ќе се одржува 25. Саем на книгата. Cвечено отворање е вечерва во 19 часот.
Годинава саемот ќе биде поместен во само една хала и ќе трае еден ден повеќе. Претседателот на Здружението на издавачи и книжарни на Македонија, Горјан Лазаревски рече дека тоа е можност за читателите да имаат цел викенд за посета на саемот, наместо тој да завршува во недела како во изминатите години.
Издавачите за Саемот ги подготвуваат промоциите на своите изданија. Покрај учеството на домашните книгоиздателства, најавија и гостување на издавачи од Србија, Албанија, Италија и од Шведска. Најавени се и промоции на нови книжевни изданија, литературни читања и средби со автори, меѓу кои и со светски познатиот детски писател, Швеѓанецот Улф Старк
Домашните издавачи најавуваат многу преводи и нови книги од домашни писатели. Тие годинава очекуваат повеќе придружни настани, дебати, трибини…
Издавачката куќа „Ѓурѓа“ за време на саемот ќе има промоција на наградениот роман од конкурсот по повод јубилејот 25 години „Мисија“ од Миле Костов. „Култура“, пак, ќе ја промовира книгата „Пишувајќи ги изгубените топки“ од Фросина Пармаковска, а нејзин промотор ќе биде писателот Ермис Лафазановски. Оттаму најавуваат и презентација на италијанските изданија на „АЛМА едизиони“ чиј промотор ќе биде Јулијана Синадиновска.
Издавачката куќа „Дијалог“ најави промоција на романите „Сестрата на Зигмунд Фројд“ и „Разговор со Спиноза“ од Гоце Смилевски и „Полицајка в кревет“ од Веле Смилевски.
„Или-или“ ги промовира романите: „Тринаесеттиот месец“ од Александар Русјаков, „Бели заби“ од Зејди Смит, „Фотосинтеза“ од Игор Ангелков, „Кругови“ од Тина Иванова
На Саемот на книгата издавачката куќа „Темплум“ ќе ја претстави новата едиција „Квир сквер“. Еден од првите три наслови во едицијата е извонредната дебитантска книга на младата словенечка авторка Уршка Стерле
И Министерството за култура ќе има свој штанд на саемот, на кој секој ден од 12 до 13 часот ќе ги презентира капиталните книжевни проекти на Владата на РМ: едицијата „130 тома македонска книжевност“ на македонски и на англиски јазик, преводите на дела на нобеловци – 145 наслови, од кои последните 20 ќе бидат промовирани следната недела, и едицијата „Ѕвезди на светската книжевност“ која опфаќа 560 наслови.