Министерот за здравство Беким Сали кој на функцијата е назначен на 16 јануари 2022 година, смета дека клучниот Закон за заштита на пациентите никаде не се спроведува и не се почитува.
Тој во интервју за поткастот на ИРЛ рече дека почнал процедура за измена на Законот за правата на пациентите и на Законот за здравствена заштита, за да се вратат надлежностите од Лекарската комора кај министерот со цел случаите кај кои има сомневања за лекарски грешки, да не се затајуваат и да имаат брз епилог.
Министерот Беким Сали откри дека за време на пандемијата и тој го изгубил неговиот татко и целосно ги разбира семејствата кои сведочат за начинот на лекување на ковид болните.
„Документарниот филм го доживеав многу емотивно. Татко ми беше во добра здравствена состојба, но почина за само 20 дена од позитивниот тест. Почина во државна здравствена институција“, рече Сали.
Министерот изјави дека здравството постои за пациентот, а не за министерот, ниту за здравствените работници. Само тогаш законите и институциите ќе бидат во функција на заштита на правата на пациентите, вели тој.
„Јас не штитам никого. Моментално сум на возраст од 44 години и за 10, 15 години и јас ќе бидам постар човек кој што ќе има потреба од здравствена услуга и од здравствена институција која што ќе пружи квалитетна и навремена услуга“, рече министерот за здравство Беким Сали по бурата што се дигна во врска со болницата Жан Митрев. (Р.Н.)