Проширувањето не беше споменато на сесијата сабајлево во Европскиот парламент (ЕП) во Стразбург на која грчкиот премиер Антонис Самарас ја најави работата на неговата земја во наредните шест месеци кога Грција ќе ја води ЕУ.
Европските пратеници и Самарас се задржаа на економскиот раст, невработеноста, монетарната унија на ЕУ како и имиграцијата. Премиерот зборуваше за потребата од даночната дисциплина и потребата да се најдат пари за реалната економија пред се преку фондови за малите и средни бизниси.
Накусо порака на Самарас беше дека Грција го остварува ветеното. “Мојата земја страдаше повеќе од било која друга. Имавме 6 години рецесија но во ЕУ сме и еве сега ја претседаваме. Грција ќе продолжи да излегува од кризата. Нашата цел е да излеземе од кризата со раст и намалување на невработеноста. Да се фокусираме на инфраструктура, енергија, нови работни места”, рече тој додавајќи дека “мораме да учиме од нашите грешки и да избегнеме нови кризи”.
Пратениците во Европскиот парламент инсистираа на тоа дека “грчката трагедија не треба да биде запоставена од г-дин Самарас и тој треба да стори се ЕУ да се здобие со вистинската банкарска унија за да се врати довербата во банкарскиот сектор”, рече првиот човек на либералите во ЕП Ги Верхофштад кој очекува од Грција нов модел на економско владеење.
Според претседателот на европските социјал-демократи, времето на сомнеж е завршено и постои доверба дека Грција успешно ќе ги извршува своите задачи како социјалната правда и солидарноста.
Имиграцијата и границите се уште еден грчки приоритет. Самарас рече дека задачата на неговата земја е да го решава овој проблем но додаде дека Европа треба да помогне за да се реши коренот на овој проблем, шверцот, мафијата…
Самарас исто така најави дека тој не очекува нови предвремени избори во Грција. “Најголемиот број од Грците не сакаат предвремени избори. Верувам дека и пратениците исто така не сакаат. Владата ќе направи се изборите да бидат во 2016 година”, рече Самарас. Тој исто така сака претседателските избори во 2015 година да донесат претседател кој ќе биде надпартиски. “Грција треба да стане нормална земја со избори секои 4 години. Излегуваме од кризата и ќе сторам се за тоа”, вети тој.
Пратениците имаа и деликатни прашања, како на пример огромната сума од 4,5 проценти од својот бруто производ, која Грција ја троши за одбраната во моментот кога е во криза и нема доволно пари за други области како на пример здравството. Одговорот на Самарас беше дека неговата земја не смее да се споредува со други земји кои имаат поинаква географска ситуација. “Нашата географска ситуација не ја споредувајте со други земји”, рече тој без да прецизира кои се заканите кои се надвиснати над неговата земја.
Единствената кандидатска земја која беше спомената е Турција. Самарас кусо рече дека Грција одблиску ги следи настаните во Турција. Според него и оваа и сите грчки влади одржуваат билатерални односи на соработка во неутрални области како туризмот и соработуваат во борбата против тероризмот и нелегалната имиграцијата.