ЕУФОР привремено ќе го зголеми бројот на своите сили во Босна и Херцеговина.
Ова е превентивна мерка спроведена со цел да се обезбеди помош за Босна и Херцеговина во интерес на сите нејзини граѓани, објави ЕУФОР.
Тие изјавија дека капацитетите на ЕУФОР играат клучна улога во одржувањето на безбедноста и стабилноста во Босна и Херцеговина.
Во наредните денови ќе има видливо зголемување на присуството на ЕУФОР. Ги уверуваме граѓаните на Босна и Херцеговина дека ова присуство, како и сите други активности на ЕУФОР, е директно поврзано со нашата задача да им дадеме поддршка на властите на Босна и Херцеговина во одржувањето на безбедноста и стабилноста, велат тие.
Тие истакнаа дека силите на ЕУФОР остануваат непристрасни, мултинационални и силни и ги имаат потребните воени ресурси за поддршка на властите на БиХ во одржувањето на безбедна и стабилна средина за сите граѓани.
ЕУФОР останува посветена на оваа задача, додаваат тие.
Членот на Претседателството на Босна и Херцеговина Денис Беќировиќ претходно го повика ЕУФОР итно да побара засилување и да распореди соодветни воени сили на стратешките точки во Босна и Херцеговина.
Додик потпишува контроверзни закони
Во средата вечерта, претседателот на ентитетот на Република Српска, Милорад Додик, потпиша укази со кои се прогласуваат закони со кои се забрануваат активностите на Судот и обвинителството на Босна и Херцеговина, Државната агенција за истраги и заштита (СИПА) и Високиот судски и обвинителски совет на територијата на БиХ.
Додик тоа го направи неколку дена откако првостепениот суд на БиХ го осуди на една година затвор и шестгодишна забрана да ја извршува функцијата претседател на РС поради неисполнување на одлуките на високиот претставник во БиХ.