Специјалниот претставик на германската влада за Балканот Мануел Сарацин денеска во Скопје порача дека Северна Македонија е на вистинскиот пат да ја реализира својата стратешка цел, но во следниот период мора да се фокусира на обврските кои произлегуваат од преговарачката рамка, на владеењето на правото, независното судство и борбата против корупцијата, за да ја задржи динамиката на напредок кон ЕУ.
Тој исто така нагласи дека како и досега Македонија ја има силната и принципиелна поддршка од европските партнери, но дека многу поважно е да имаме политички консензус и проактивност од сите политички партии за евроинтегративниот процес.
На средбата со вицепремиерот за европски интеграции Бојан Маричиќ ,Сарацин уште еднаш ги посочи германските позиции за проширувањето на ЕУ и за актуелните геостратешки настани во Европа и рече дека Германија е наш искрен партнер на патот кон членство во ЕУ и ќе се залага што поскоро да се случи обединувањето на регионот со ЕУ.
Од своја страна вицепремиерот Маричиќ рече дека владата е максимално посветена на процесот на преговори со ЕУ.
Оптимист сум дека нашите обврски како држава ќе ги исполниме во предвидениот рок. Почетокот на пристапните преговори се наш поттик за забрзување на интеграцијата и продолжување на реформите, со кои ќе им обезбедиме подобар квалитет на живеење за нашите граѓани. Очекуваме поддршка за забрзување на процесите кои ги правиме на евроинтегративниот пат од нашите пријатели во ЕУ. Не смееме да го пропуштиме моментумот, рече Маричиќ на средбата.
Мануел Сарацин се сретна и со пратениците од опозициската ВМРО ДПМНЕ.
На средната пратеникот на ВМРО-ДПМНЕ, Антонијо Милошоски истакна дека пратениците од опозицијата не го менуваат ставот.
Тие на Сарацин му кажале дека според дел од истражувањата на јавното мислење, дури 85% од Македонците се против, како што вели, наметнатото барање за промена на Уставот.
Прашан за аргументите на германскиот претставник кој побарал ВМРО да гласа за уставните измени, но и пораката од високиот претставник на САД, Габриел Ескобар, кој кажа дека опозицијата треба да го поддржи европскиот пат на земјава, а не да дава поддршка на премиерот, Милошоски одговори:
„Триесет години Македонија прави отстапки, триесет години имаме емисари од многу европски земји коишто секогаш тврдат дека уште ова барање кое е последно треба да се исполни и утре станувате членка на ЕУ или почнувате преговори… Многу такви отстапки се направени, но дадените ветувања не се исполнети“, рече Антонијо Милошоски – пратеник на ВМРО-ДПМНЕ.
Според Милошоски, за лицата од дипломатскиот корпус е многу полесно да нудат решенија, отколку граѓаните да ги прифатат. Сарацин ќе замине од земјавата без изјава за медиумите, но според информации од владејачкото мнозинство, тој им порачал на пратениците од ВМРО-ДПМНЕ да ги изгласаат уставните измени до септември годинава.