„На Европскиот совет не беше кажано „не“ за да почнете процес на преговори, туку дека ова прашање повторно ќе биде ставено на разгледување. Треба да и објасниме на јавноста дека не се работи за „не“, ниту за историска грешка. Јас претпочитам да кажам дека се работи за еден историски застој, за да се навратиме пак и овој процес на преговори да почне што е можно побрзо. Имаме заедничка иднина, да ја напишеме заедно“, рече претседателот на Европскиот Парламент Давид Сасоли од македонското Собрание каде имаше свое обраќање.
„Направивте голем напор дури и го сменивте уставното име, но немојте да жалите поради тоа. Тоа беше многу важна работа со која треба да се гордеете и што треба да ја покаже вашата храброст, и што ќе ви овозможи не само да барате преговори и членство, туку и да пристапите кон евроатлантските сојузи и тие два момента ќе бидат многу важни за вашата иднина. Ова е одлучувачки чекор што им покажа на европските иституции дека сте подготвени за заеднички пат со нас. Тоа е сигнал што треба да го пренесете на јавното мислење и сакам да заблагодарам во оваа сала, до медиумите, бидејќи видов толкава страст како во Брисел така и овде во овие два дена, дека не смееме да застанеме и сите да се заложиме. Забелешките што беа кажани од малку држави сигурен сум дека ќе успееме дефинитивно да ги замолкнеме и да ги расчистиме проблемите што се појавија, рече Сасоли.
Рече дека вчера на средбата со премиерот Зоран Заев разговарале за тоа дека блокадата што се случи во Брисел е еден мал застој, еден преоден момент и дека постојат голем број европски институции, Европскиот Парламент, Европската Комисија, Европскиот совет, кои се убедени дека процесот на преговори треба да почне што е можно поскоро.
Свесни сме и убедени, дека Северна Македонија треба побрзо да го почне и да го заврши процесот на пристапување кон ЕУ, кажа Сасоли.
„Се разбира сфаќаме дека и ЕУ треба да го направи својот дел од работата и земјите кои се заинтересирани за влез да продолжат по својот пат. Преговорите ќе бидат момент што само ќе го зајакне процесот на реформи, за кои Северна Македонија има потреба да ги заврши. Утрово ми остави голем впечаток состанокот со политичките партии во Парламентот и сфатив дека во плурализмот на мислењата слушнав едно заедништво, еден заедничко чувство за процесот на преговори да почне. Да слушнам од нив дека Европа е нивната иднина, тоа е позитивен сигнал и да им кажеме дека овој пат повторно ќе продолжи и затоа имаме потреба од вас од вашиот ентузијазам, од вашата желба за слобода и демократија, за учество во создавањето на иднината на ЕУ“, рече тој.