Огромна масовна гробница може да се види на сателитски снимки пред црквата во Буча во близина на украинскиот главен град Киев.
На фотографиите, направени од компанијата „Максар технолоџис“ на 31 март, се гледа ров долг 14 метри југозападно од црквата и официјални лица кои ги отстрануваат телата на украинските цивили.
Засега неа рочни информации за тоа колку тела се извадени од оваа гробница, но „Москва тајмс“ пишува дека таму биле закопани 57 луѓе.
Според градоначалникот Анатолиј Федорук за АФФ, властите во Буча веќе закопале 280 луѓе, откако руските трупи се повлекле од областа, додавајќи дека улиците се полни со трупови.
Буча, град со околу 28.000 жители, стана сцена на интензивни борби кога почна инвазијата на 24 февруари. Предградијата на Киев минаа со недели под руска воена контрола, објави „Киев индипендент“, а кога градот повторно беше заземен, биле пронајдени останки на стотици убиени украински цивили.
Претходно, на социјалните мрежи се појавија видеа на кои се гледаат безживотни тела на улиците на градот Буча. Дел од западните медиуми објавија дека најмалку 20 мртви мажи во цивилна облека биле пронајдени на една улица откако украинските сили ја вратија контролата врз Буча.