Странката на демократска акција на Македонија (СДА Македонија) го осуди однесувањето на претседателот на Србија, Александар Вучиќ, кон заменик-генералната секретарка на НАТО, Радмила Шекеринска, оценувајќи дека станува збор за „примитивен однос“, се наведува во соопштението на партијата.
Реакцијата доаѓа по изјавите на Вучиќ на маргините на Минхенската безбедносна конференција 2026 година, во кои тој ја критикуваше Шекеринска.
Сметаме за важно да му се укаже на Александар Вучиќ дека нема морално право било кого да обвинува за сецесија. Посебно не лажно, без аргументи и со извртување на тези да обвинува заменик-генерален секретар на НАТО, во случајот Радмила Шекеринска, наведуваат од СДА Македонија.
Од партијата оценуваат дека ваквиот однос не е само личен, туку има поширока политичка димензија.
Примитивниот однос на претседателот на Србија кон заменик-генералниот секретар на НАТО не може да се смета за личен однос. Тоа е однос на претседателот на Србија кон НАТО, но и негов однос кон позицијата на државата од каде што доаѓа заменик-генералниот секретар, во случајот Република Северна Македонија, се наведува во соопштението.
СДА Македонија го критикуваше и, како што наведуваат, „молкот“ на државниот врв во Северна Македонија.
Запрепастувачки е молкот на претседателката на државата, Гордана Силјановска – Давкова, како и молкот на Владата на Северна Македонија. Сметаме дека претседателката и претседателот на Владата треба да упатат реакција до претседателот на Србија со осуда за неговиот некоректен однос, стои во реакцијата.
Во соопштението, партијата изразува поддршка за членството на Северна Македонија во НАТО и ја истакнува позицијата на Шекеринска во Алијансата.
Мнозинството граѓани на Република Северна Македонија се горди што нашата држава е дел од НАТО, кој претставува најголем безбедносен, демократски и економски сојуз во светот. Горди сме и што заменик-генерален секретар на НАТО доаѓа од Република Северна Македонија, наведуваат од СДА Македонија.