Скопје: Партијата СДА Македонија обвини дека изолационистичката политика на владата ја води македонската економија кон сериозна криза и пад на животниот стандард на граѓаните.
Според партијата, блокираниот европски пат на Северна Македонија ја вовел државата во општествена криза која веќе има негативно влијание врз економијата. Од СДА Македонија тврдат дека, и покрај владините тврдења за економски раст, релевантните анализи покажуваат дека квалитетот на живот на граѓаните во земјата е понизок во споредба со граѓаните во Босна и Херцеговина, Србија, Црна Гора и Албанија.
Квалитетот на живот на нашите граѓани одамна не може да се споредува со квалитетот на живот во Хрватска, Грција и Бугарија, наведуваат од партијата, додавајќи дека доколку актуелната политика продолжи, стандардот во Северна Македонија би можел дополнително да заостанува зад регионот, особено доколку Црна Гора и Албанија станат членки на Европската унија.
Од СДА Македонија истакнуваат дека владата се потпира на кредити за покривање на буџетските дефицити наместо за развојни проекти. Според нив, државата доцни со исплатите кон економските субјекти, како и со повратот на ДДВ кон компаниите, што создава сериозен притисок врз приватниот сектор.
Партијата ја критикува и политиката во однос на минималната плата, наведувајќи дека во услови на зголемени трошоци за живот, владата одбива суштинско зголемување на минималната плата. Според нивните наводи, минималната плата во Северна Македонија е пониска од минималната плата во Босна и Херцеговина, Србија, Црна Гора и Албанија.
Во соопштението се наведува и дека странските инвестиции во 2025 година изнесувале 467,5 милиони евра, што според СДА Македонија претставува пад од 61% во споредба со 2024 година.
Од партијата оценуваат дека ваквите економски показатели се резултат на, како што велат, „неодговорна владејачка структура која неуспесите ги прикрива со националистичка реторика“, додека економијата се соочува со сериозни предизвици.