Антикорупцискиот тим на СДСМ – АКТ денеска ја претстави новата дигитална платформа за борба против корупцијата и организираниот криминал.
Станува збор за Македонски Истражувачки Центар за Корупција и Организиран Криминал – МИЦКО, достапен на веб-страницата www.micko.mk, којa, како што велат од партијата, има за цел истражување, анализа и архивирање на јавно достапни материјали поврзани со наводни корупциски случаи во државата.
Платформата собира, анализира и систематизира информации од различни извори со цел да се обезбеди поголема транспарентност и информираност на јавноста“, изјави генералниот секретар на партијата, Александар Саша Димитријевиќ.
Според најавите, МИЦКО ќе се фокусира на длабинско истражување на тендери, медиумски објави и случаи на корупција, вклучително и судири на интереси и сомнителни операции во политиката, јавниот сектор и институциите на локално и централно ниво.
Платформата ќе функционира и како архивски регистар на наводни случаи, со наведени извори, датуми и релевантни детали, што ќе овозможи полесен пристап и пребарување за граѓаните, новинарите и истражувачите.
На МИЦКО веќе се објавени досегашните случаи обелоденети од АКТ, меѓу кои: случај со фирма со двајца вработени, основана минатата година, која добила тендери вредни околу 9 милиони евра, случај со компанија која добила 161 тендер во вкупна вредност од 5,3 милиони евра, како и случајот со преземањето на Алта банка, за кое СДСМ тврди дека е дозволено од НБРМ под сомнителни околности и со сомнителен капитал.
Од денеска платформата е активна и целосно оперативна, а од СДСМ упатија повик до граѓаните, невладините организации, новинарите, медиумите и истражувачите да се вклучат и да дадат придонес.
Платформата, како што додаваат од опозициската партија, овозможува и директно пријавување на корупција и криминал, со можност за прикачување документи, при што пријавите можат да се поднесат и анонимно.