Информациите дека печката за производство на фероникел во ФЕНИ е изгасена се загрижувачки и укажуваат дека новиот инвеститор нема намера да започне со рестарт на фабриката во скоро време, обвинија денеска од општинската организација на СДСМ Кавадарци.
Според Вуко Мелов, советник и претседател на ОО СДСМ Кавадарци, гаснењето на печката значи дека реконструкцијата и повторното пуштање во употреба ќе одземе долг временски период, што ќе предизвика сериозна штета за економскиот развој на градот.
Опозициската партија обвинува дека пропаднале сите изјави и најави на премиерот Христијан Мицкоски и градоначалникот Митко Јанчев за наводен рестарт на компанијата.
„Власта ги остави работниците буквално на цедило! Иако во предизборните кампањи лесно власта даваше ветувања дека компанијата ќе ги исплати сите плати на работниците, ќе ги исплати сите доверители, и ќе започне за брзо со производство а со тоа ќе го врати работниците назад на своите работни места. Од тоа денес во најголем дел нема ништо“, изјави Мелов.
Тој додаде дека голем број работници останале без егзистенција и без исплатени плати, а неисплатени останале и доверителите и транспортерите.