СДСМ тврди дека владејачката ВМРО-ДПМНЕ започнала „организирана и координирана операција“ за уривање на партијата одвнатре, откако Антикорупцискиот тим на СДСМ започнал јавно да објавува информации за, како што наведуваат, криминални тендери и коруптивни зделки поврзани со актуелната власт.
Во момент кога преку Антикорупцискиот тим систематски ги отвораме и разобличуваме криминалните тендери, коруптивните зделки и предавствата на актуелната власт, ВМРО активираше координирана операција за уривање на СДСМ одвнатре, соопштија од партијата.
Од СДСМ наведуваат дека нападите кон партијата не постоеле во изминатата година и половина, туку, според нив, започнале токму по објавувањето на конкретни случаи и новата платформа за борба против криминалот и корупцијата.
Како примери, од партијата посочуваат на 161 тендер доделени на една фирма во вкупна вредност од 5,3 милиони евра, 9 милиони евра за фирма со двајца вработени, како и „милионски тендери за студент на Мицкоски за само два месеци“.
Затоа ВМРО сака да ја урива СДСМ одвнатре, се наведува во соопштението.
Според СДСМ, станува збор за „синхронизирана акција“ во која, како што тврдат, се вклучени поранешни функционери, лица кои подолг период не биле присутни во јавноста, како и поединци кои ја напуштиле партијата и се приклучиле на структури блиски до ВМРО-ДПМНЕ и ЗНАМ.
Од СДСМ порачуваат дека нема да се откажат од објавувањето на, како што велат, сите информации поврзани со криминал и корупција.
СДСМ нема да биде замолчена. Антикорупцискиот тим продолжува со работа, а на дигиталната платформа МИЦКО.мк секојдневно пристигнуваат нови пријави од граѓаните, наведуваат од партијата.
Во соопштението се додава дека „вистината веќе излегла на виделина“ и дека секој кој е вмешан во криминал и корупција ќе сноси одговорност.