Два дена по референдумот, партиските раководства на СДСМ и на ВМРО ДПМНЕ вечерва ќе одлучуваат за своите идни потези. Деликатнатата позиција во која се најде државата остава неколку опции – или да се обезбеди двотретинско мнозинство во Собранието за усвојување на уставните амнадмани со поддршка од дел од пратениците на ВМРО ДПМНЕ што во овој момент се чини невозможно, да се организираат нови избори, или да се формира широка Влада.
На пратеничката група на СДСМ, заедно со албанските партии им недостигаат 8 пратеници за гласање на уставните амандмани во Собранието кои се носат со двотретинско мнозинство, односно со 80 гласови.
СДСМ може да се обиде да ја добие поддршката од тројцата пратеници од Социјалистичката партија – Владанка Авировиќ, Љупчо Димовски и Стојан Миланов, од пратеникот Панчо Минов на ГРОМ и од Зеќир Рамчилович од партијата на Бошњаците „АВАЗ“, но и со нив не се стигнува до потребниот број на пратеници потребни за отворање на Уставот. Пратениците на ВМРО ДПМНЕ кои гласаа на референдумот – Драган Данев и Даниела Рангелова, веќе се изјаснија дека без консензус нема да подржат уставни измени.
Ваквата ситауција, неминовно води до избори или до ново Пржино коментираат аналитичари за НОВА ТВ.
И Зијадин Села од Алијансата на Албанците се согласува дека избори мора да има, но прво да поминат уставните измени.
„Уставните измени мора да поминат. Дури и мнозинството да излезеше и да гласаше на референдумот, исходот ќе мораше да заврши во Парламентот. Сега политичарите треба да соберат сили, да направат внатрешни компромиси со сами себе и овие уставни измени да поминат. Но и да поминат уставните измени, државата мора да оди на нови избори, но друго е да се оди на избори со усвоени уставни измени, вели Села за НОВА ТВ.
Во однос на информациите за формирање на широка коалиција до влезот на државата во НАТО , Села вели дека „за ова прашање требаше да се размислува пред рефрендумот, но не е премногу доцна и сега“.
„За вакво важно прашање, за промена на името и за уставни измени одговорноста треба да се подели, но да се поделат и заслугите. Широка коалиција од сите политички чинители ќе покаже дека се работи за компромиси кои се прават за земјата да стане членка на НАТО и да ги почне преговорите со ЕУ. Тоа би се ценело и кај пријателите од Европа но и во домашната јавност“ кажа Села за НОВА ТВ.
Љупчо Петковски од Евротинк очекува дека има обид за договор меѓу партиите, но рано е да се каже како ке заврши.
„Ако не се постигне договор на ново „Пржино 3“, ќе има избори“, вели Петковски.
Претседателот на опозициската ВМРО-ДПМНЕ, Христијан Мицкоски веќе ги испорача барањата на опозицијата и власта експресно ги одби. Тој побара смена на државниот јавен обвинител со нов опозициски обвинител и формирање на собраниска анкетна комисија за референдумот.
Од СДСМ одговорија дека со барањето за смена на обвинителот, Мицкоски всушност бара амнестија.
„Во клучен период за иднината на државата, Мицкоски уште еднаш покажува дека не му се важни ниту граѓаните, ниту државата. Единствено Мицкоски се грижи за амнестијата на неговиот Никола Груевски“.
Должност на сите политичари, вклучително и на раководството на ВМРО-ДПМНЕ, е да ја почитуваат волјата на мнозинството граѓани. Наместо да бара амнестија, Мицкоски да побара од пратениците на ВМРО-ДПМНЕ да ја почитуваат волјата на мнозинството граѓани, да ги забрзаме процесите за конечно членство во ЕУ и НАТО“ одговорија од СДСМ.
Од СДСМ исто така кажаа дека нема да се формира техничка Влада пред одржувањето на изборите, бидејќи доколку се одржат тие ќе бидат итни.
Со вакви спротиставени ставови, не се наѕира брз излез од политичката криза во која влегува државата.
Извршниот и Централниот одбор на СДСМ вечерва се очекува да одлучат дали партиското раководство ќе се обиде да ја одоброволи опозицијата или ќе поднесе иницијатива за распуштање на парламентот.
Од ВМРО ДПМНЕ велат дека на седницата на Извршниот комитет ќе дискутираат за се што се случувало на референдумскиот ден, резултатите и што понатаму. Од таму додаваат дека „сите мора да ја почитуваат волјата на граѓаните која се виде на референдумот и кој беше неуспешен“.
Доколку има вонредни избори тие би требало да се распишат веднаш и да се одржат во најкус можен рок од 45 дена.