Претседателот на СДММ и пратеник Стефан Богоев денеска презентираше мерка за платена работа за студенти во студентските кампуси додека студираат, со цел финансиски да заработат за време на студиите.
Како што посочи тој, мерката произлегла од самите студенти, а ќе можат да работат во студентските кафетерии, како и во други објекти во рамките на студентските домови.
– Студентите ќе добијат шанса за заработка преку работа со скратено работно време, таканаречена part-time job. Студентите ќе можат да работат во студентските ресторани или кафетерии, ќе може да работат на организација на културно-забавни настани, ќе може да работат како водичи на нивните колеги студенти-бруцоши или како асистетни за административни обврски во рамки на студентскиот кампус. Студентите исто така ќе може да работат и во читалните и во библиотеките. Целта на оваа мерка, е студентите во текот на нивното студирање да може да заработат пари за да може да си ги намалат своите трошоци на студирање и на живеење, но исто така, целта е и студентите да бидат самостојни а не да зависат само од парите на нивните родители, изјави Богоев.
Одговарајќи на кој начин би се вработувале во мензите, бидејќи има студенти коишто не живеат во студентските домови, тој вели оваа мерка е токму за оние кои доаѓаат од различни градови на Македонија а додека студираат во Скопје, живеат во домовите.
– Оваа мерка се однесува на студенти коишто живеат во студентски домови и целта е со скратено работно време да работат на некое од овие места. Ова е мерка којашто ја има и во западно-европските земји. Не би бил којзнае колкав надоместок но би бил доволен за да ги скрати трошоците за нивното студирање, дополни тој.
Според него, моменталната слика за сегашниот студентски живот е катастрофална бидејќи студентите живеат во руинирани, во распаднати студентски домови, а студентскиот стандард е на најниско можно ниво.
– Нашите истражувања велат дека на просечен студент, сместен во студентски дом месечно му се потребни 10.200 денари, додека минималната плата е 10.080 денари, што значи – родител на дете сместено во студентски дом, дури и да ја потроши целата негова плата нема да е доволно да ги покрие месечните трошоци, посочи тој.