Одговорајќи на новинарско прашање, потпретседателката на СДСМ Кристина Костова изјави дека предлогот за резолуција со Бугарија за македонски јазик е штетна и дека ВМРО-ДПМНЕ отвора затворени прашања и удира врз македонските позиции.
Предлогот за заедничка резолуција со Бугарија за македонскиот јазик и идентитет е штетен, претставува нов удар врз македонските позиции од ВМРО-ДПМНЕ за свесно враќање наназад. Клучното прашање е зошто власта отвора прашања кои веќе се затворени кога македонскиот јазик и идентитет се неспорни, потврдени и признаени во светот и Европа. Овој потег ѝ дава дополнителен маневарски простор на бугарската страна за нови условувања. ВМРО-ДПМНЕ нема никакво влијание во Европскиот парламент ниту сојузници што се потврди и со гласањето за извештајот. Ваквата резолуција би значела нов пораз во ЕП. Штетни и исклучиво за тесно политички интереси се овие непромислени политики на ВМРО-ДПМНЕ со кои самите го оспоруваат она што веќе никој не го оспорува. Прашањето е дали ВМРО-ДПМНЕ свесно сака да ја втурне државата до пораз во пораз за потребите на своја кампања? Дали ова не е уште едно договорено сценарио со дел од ним блиски бугарски европратеници за креирање повторно страв за македонскиот јазик и идентитет? Штетите кои се прават со овие политики ќе бидат трајни, изјави Косотва.