Опозицискиот СДСМ денеска ја обвини власта дека со неодговорно однесување направила вкупниот јавен долг да достигн историско ниво, односно од вчера тој и официјално е 4 милијарди 760 милиони евра, или 50 проценти од бруто домашниот производ.
– Секој ден во 2016 година власта на Груевски ги задолжувала граѓаните по 2 милиона евра. За последниве 9 месеци вкупниот јавен долг Македонија го зголемиле за над половина милијарда евра или неверојатни 532 милиони евра. Ова значи и дека секој граѓанин на Р. Мaкедонија е задолжен со 2.274 евра Секое бебе се раѓа со долг од 2.274 евра, се вели во соопштението од СДСМ.
Според опозицијата, вкупниот јавен долг ги надмина ризичните 50 проценти од БДП, како што предупреди и Светска банка кога изрази загриженост за огромните задолжувањата на Македонија.
– Дополнително за денеска, извршителот на Груевски, министерот за финансии Кирил Миноски има најавено ново задолжување на домашниот пазар од 61.5 милиони евра, велат од СДСМ и најавуваат дека „сите задолжувања направени на товар на граѓаните ќе бидат преиспитани и за сите злоупотреби на парите на граѓаните ќе има одговорност“.
Од Министерството за финансии преку соопштение одговорија дека половина од долгот на држата за кој СДСМ најавува ревизија е наследен од нив.
– Во 2005 година долгот на државата изнесуваше 2 милијарди евра, односно половина од долгот на државата за кој СДСМ најавува дека ќе направи ревизија е наследен од нив. Ова е реакцијата на Министерството за финансии по однос на висината на јавниот долг на Македонија кој надмина 50 отсто од БДП. Го охрабруваме СДСМ да каже за што се земени кредити за долгот кој тие го акумулирале.
Изминативе години Македонија има интензивни инвестициски активности во инфраструктурата, како изградбата и рехабилитацијата на патните и железничките делници на Коридорите 8 и 10, изградбата на регионални и локални патишта, гасификацијата. Обезбедени се средства за изградбата и модернизацијата на клиничкиот центар Мајка Тереза и регионалната клиничка болница во Штип, за проектот Подобрување на општински услуги итн. Македонија преку кредит од Европската инвестициска банка во вредност од 350 милиони евра, во време на светската криза, кога капиталот беше тешко достапен, го поддржа приватниот сектор со пласирање на субвенционирани кредити на малите и средни претпријатија, се вели во соопштеието од Министерство за финансии.