За да се пресмета помал ДДВ во крајната цена на дизелот и на бензинот потребна е соодветна процедура. Вчера не се спомена дека Владата донела одлука за кризна состојба, но денес тоа премиерот го нафрли како одговор на новинарско прашање.
Регулаторната комисија за енергетика уште не соопштува колку од полноќ ќе биде новата цена на бензините и на дизелот. Премиерот Христијан Мицкоски на вчерашната прес-конференција соопшти дека Владата донела одлука за намалува на данокот на додадена вредност од 18 на 10 проценти. Но, дали е запазена процедурата за да може Регулаторната комисија за енергетика да го пресмета помалото ДДВ во крајната цена? Досега, сите промени на ДДВ одеа со законски измени.
Вчера Мицкоски не спомена прогласување на кризна состојба, но денес одговарајќи на новинарско прашање рече дека Владата вчера донела одлука за кризна состојба и за намалување на данокот. Но, не појасни дали треба да се менува законот, или одлуката во кризна состојба е доволна.
– Владата вчера донесе одлука за прогласување на кризна состојба, а потоа донесовме одлука и за намалување на данокот на додаден вредност од 18 на 10 проценти. Не сме едни од ретките влади во Европа, можеби има уште една или две влади, кои директно од буџетот го поддржуваат стандардот на граѓаните. Имаме уште неколку чекори, уште неколку мерки, но сме претпазливи. Во овој момент имаме предизвици и ќе ги имаме. Но, електроенергетскиот сектор во државава е стабилен и стабилно е снабдувањето со нафта и со нафтени деривати. Не само што ги задоволуваме потребите на нашите граѓани, туку поради тоа што имаме најниска цена во регионот, многу граѓани од соседството доаѓаат да полнат бензин – рече Мицкоски.
Тој информираше дека очекува разбирање од „Окта“ и за поголемо намалување на цените.
Во Законот за акцизи пак има во кои случаи треба да се намалат акцизите. Тоа е поврзано со цени на нафтените деривати. Но, иако намалувањето е согласно закон, Владата не го применува, туку, како што вели Мицкоски се одлучиле на порубосно намалување.
– Имаме најниски давачки кон Владата кога станува збор за бензините и дизелот. На пример во Хрватска и во Србија давачките се двојно поголеми. Правевме анализа, имајќи ги предвид цените на берзите за безоловниот бензин 95 и 98 октани и на дизелот, а референтна берза за нас е италијанската, дојдовме до заклучок дека намалувањето за бензините ќе беше 1 денар по литар, а за дизелот ќе беше 2 денари. Затоа одлучивме да имаме поробустна, поголема интервенција и на овој начин се намалуваат цените за 6,5 до 7 денари по литар. Се разбира, состојбата и понатаму ќе ја следиме – рече Мицкоски.
Според него, дневна заштеда на граѓаните од намалениот данок на додадена вредност е околу 200.000 евра, односно околу 1,5 милиони евра неделно треба да останат кај населението.
Извор: Слободен печат. мк/ Весна Дамчевска