Видеото со новата песна на Тоше Проески „Све је ово премало за крај“ од денеска може да се види на www.onairmusic.mk
Фондацијата „Тоше Проески“ одлучи да ги заштити делата на починатиот пејач од секакви злоупотреби. Како ексклузивен сопственик на неговите дела, фондацијата склучи договор со канадската музичка компанија OnAir.FM.
Исто така OnAir.FM Macedonia ги извести фановите на Тоше Проески да не ги злоупотребуваат видео клиповите со преаплоадирање на разни youtube канали бидејќи со таков чекор само одмагаат кон целта да се зачува културното богатство кое зад себе го остави Тоше.
Триесет и вториот роденден на Тоше денеска се одбележува во Спомен-куќата во Крушево, каде што во чест на најголемата македонска музичка ѕвезда се одржа концерт на кој ќе бидат изведени негови песни.
Настапија Билјана Талеска, Андријана Јаневска, „Некст тајм“, Александра Пилева, Бендот на Тоше и неговиот внук Кристијан. Ликовниот уметник Сократ Лафазановски подари слика во чест на Тоше.
Годишнината од раѓањето на Тоше ќе биде одбележана со промоција на албум со најголемите негови хитови, меѓу кои е и една нова песна „Све је премало за крај“, за која ќе биде промовиран и видеозапис. Тоше ја снимил песната во 2006-та, автор на музиката и текстот е Јелена Трифуновиќ, а аранжманот е на Никша Братош.
За роденденот на Тоше во Дом на АРМ во Скопје има акција за дарување крв која ја организира Црвениот крст на Град Скопје во соработка со Тоше фан клуб форумот.
Оваа година се очекува и објавувањето на книгата за Тоше со наслов „Ова не е крај“ на која работи Соња Алексовска-Неделковска.
Во изминатите четири години, меморијалните концерти за роденденот на Тоше се одржуваа во Скопје. Првиот беше на 5 октомври 2008 на Градскиот стадион, каде учествуваа познати имиња од естрадата на Балканот, а присуствуваа над 40.000 луѓе. Беше насловен „Те сакаме сите, Тоше“ и беше по повод една година од последниот негов концерт.
Со одлука на фондацијата, од 2010-та концертот за Тоше се одржуваше на неговиот роденден во јануари, а фановите продолжија да го одбележуваат и датумот од последниот концерт и на секој 5 октомври да организираат „Ѕвездено небо“ на плоштадот во Скопје. Во 2010. и 2011 година меморијалниот концерт „Со љубов за Тоше“ се одржа во преполниот Спортски центар „Борис Трајковски“, каде настапија негови колеги, пријатели и соработници од регионот.
На сите меморијални концерти имаше и изненадувања за публиката, постхумна промоција на непознати композиции од Тоше, како дуетот со внук му Кристијан – „My Little One“, потоа „Још увек сањам да смо заједно“, „Наслони главу на моје раме“, „Can You Feel The Love Tonight“…
Четвртиот концерт минатата година беше поинаков од претходните и се одржа во Македонската опера и балет. Идејата на организаторите била на публиката да и се открие првата љубов на Тоше – операта, па неговите хитови прозвучија како арии, изведени од познати солисти од Македонија и од соседните земји.