„Танцот ги спојува уметноста и културата и ги соединува сите нации во светот. Да се танцува е да живееш, да се чувствуваш жив, да се чувствуваш слободен, да се изразиш. Говорејќи преку движење, ставајќи ги сите емоции на отворен простор значи да ~ дадеш на публиката нешто по што ќе те запамети. Танцот може да промени нешто во нив без нивно знаење. Танцот доаѓа од еден многу искрен простор, па затоа зборувај од срцето и си ќе те следи потоа“, вели во својата порака кореографката Саша Евтимова упатена преку Интернационалниот танцов институт во чест на Светскиот ден на танцот, 29 април.
Тајванскиот кореограф Лин Ваи-Мин е авторот на светската порака и вели:
„Во ова дигитализирано време сликите во движење заземаат милион форми. Тие се фасцинантни. Но, тие никогаш не можат да го заменат танцот бидејќи сликите не дишат. Танцот е славење на животот. Исклучете ги телевизорите, исклучете го компјутерот и дојдете да танцувате. Да го прославиме животот со танц“, пишува тајванскиот кореограф.
Македонскиот Центар на Интернационалниот Театарски Институт избра членови на Танцовиот одбор на ИТИ Македонија, за периодот од 2013-2016, се: Билјана Тануровска, Соња Џепароска, Ивана Коцевска, Александра Мијалкова, Искра Шукарова и Кире Миладиновски
Танцовиот Одбор на ИТИ ја избра Саша Ефтимова (балерина и кореограф), за носител на македонската порака по повод Светскиот ден на танцот, 29 Април, 2013.
И Скопската танцова академија ќе го одбележи празникот на танцот. Првата генерација студенти на академијата во 20 часот на сцената „Зебра“ ќе ја изведе кореографијата „Хот“ составена од четири дела – „Загреј го студот“ на Матеја Kиселичка, „Патот на љубовта“ на Андријана Атанасова и „Патот на еволуцијата“ на Љупчо Атанасов, изработени под менторство на Рисима Рисимкин. Последниот дел е кореографијата „Импакт“ на Игор Kиров.
Светскиот ден на танцот се прославува на денот на раѓањето на творецот на современиот балет Жан-Жорж Новер (1727-1810).