Водена од мотото „Минато, сегашност, иднина – Секогаш е време за мода“, новата сезона на Моден викенд Скопје ќе се одржи од 1 до 9 април. Седмото издание, пролет/лето 2013, ќе стави акцент на модата како неизбежен дел од секојдневието. Во рамките на седмата сезона ќе бидат претставени повеќе од 20 дизајнери.
Оваа сезона „Моден викенд Скопје“, покрај модните ревии и изложби, ќе организира и проект „Ретроспектива на модата во Македонија 1983 – 2013“, со кој ќе се долови процесот на создавање колекции кои не познаваат граници. Една ретроспектива, која ќе не’ врати назад во времето, ќе го поврзе тоа што било со тоа што се создава денес и ќе се погледне напред во тоа што нѐ очекува понатаму.
Исто така, се реализира и конкурс организиран од Амбасадата на Соединетите Американски Држави – Скопје и Модниот викенд Скопје (FWSK) на тема „ПОП! Мода“. На победниците на конкурсот ќе им биде овозможено да ги презентираат своите дизајнерски идеи на модната вечер, што ќе се одржи во Амбасадата на САД.
Минатата недела беа реализирани фотосесии за кампањата и за каталогот за новата сезона на Моден Викенд Скопје – пролет/лето 2013, со кои FWSK тимот го одбележа почнувањето на претстојното издание. Како заштитни лица на новата кампања се појавуваат три модели, кои претставуваат три различни генерации: Ирина Илиевска, Ивана Гелева и Јорданка Михајловиќ.